.png)
🟢 أول حاجة خاصنا نفهموها هي أن المغرب ما بقاش باغي يستمر فسياسة تدبير النزاع إلى ما لا نهاية. كان هناك توجه نحو تغيير مهمة المينورسو وتسميتها، باش تولّي منسجمة مع المرحلة السياسية الجديدة، ويكون الحكم الذاتي تحت السيادة المغربية هو أساس المفاوضات. ولكن هاد المشروع اصطدم بالفيتو الروسي.
🟢 وهنا كيبان أن المغرب كان خاصو يكون مستعد لجميع السيناريوهات. فالدبلوماسية ماشي غير أنك كتوجد للخطة الأولى، ولكن حتى كتوجد للخطة البديلة إلا ما وصلتيش للنتيجة اللي باغي. وعدم تجديد المهمة، من بعد رفض المشروع الأمريكي والمشروع الروسي، فتح مرحلة مختلفة تماماً.
🟢 المغرب ما اكتفاش بالإعلان عن عدم تجديد المهمة، بل الديوان الملكي وضّح أن وجود المينورسو فالأقاليم الجنوبية، بجميع موظفيها ومركباتها ومعداتها ورموزها، خاصو ينتهي فالأيام المقبلة. بمعنى أن الموضوع ما بقاش متعلق غير بتغيير الاسم أو تعديل الاختصاصات، وإنما بمغادرة البعثة بشكل كامل.
🟢 ومن النتائج السياسية اللي كيتجه ليها المغرب إنهاء الاجتماعات الدورية لمجلس الأمن حول الصحراء، والتقارير المنتظمة للأمين العام، والإحاطات اللي كان كيقدمها المبعوث الشخصي. وهي خطوة كتستهدف إخراج الملف من دوامة التدبير الأممي الدوري، والانتقال به لمرحلة سياسية جديدة، يكون فيها الحكم الذاتي هو محور الحل.
🟢 والأهم أن الموقف الروسي ما بقاش مجرد اختلاف تقني حول صياغة قرار أممي؛ بل أصبح عندو ثمن دبلوماسي وسياسي، خصوصاً أن مشروع موسكو البديل حتى هو ما حصلش على الأصوات الكافية. وهاد التطور كيطرح أسئلة كبيرة حول مستقبل دور روسيا، وحول موقع الجزائر فالمسار المقبل.
🟢 أما من الناحية العسكرية، فمغادرة المينورسو غتعني نهاية وجود المراقبين الأمميين فوق الميدان، وبالتالي غادي تكون هناك مرحلة جديدة فمراقبة الوضع الأمني ووقف إطلاق النار. والمغرب مطالب يحافظ على جاهزية القوات المسلحة الملكية، ويضمن حماية المواطنين والوحدة الترابية، مع الاستمرار فاحترام التزاماته المتعلقة بوقف إطلاق النار و ربما نشوفو اكتساح مغربي للمنطقة العازلة ..
🟢 ومن الناحية الاقتصادية، وضوح الرؤية السياسية يقدر يعطي دفعة إضافية للاستثمارات فالأقاليم الجنوبية، خصوصاً المشاريع الاستراتيجية بحال ميناء الداخلة الأطلسي، والطاقات المتجددة والهيدروجين الأخضر، والبنيات التحتية والطرق اللي غادي تربط المغرب بعمقه الإفريقي.
🟢 و كاينة نقطة أخرى مهمة ؛ هاد التطور كيبين ان هناك توجه مغربي نحو تنويع آليات تدبير النزاعات الدولية، وعدم حصر مستقبل القضايا الاستراتيجية فمؤسسات أممية ولات قراراتها كتتعطل بسبب حسابات القوى الكبرى؟ خصوصاً مع بروز مبادرات دولية جديدة، بحال مجلس السلام بقيادة الولايات المتحدة الأمريكية و اللي انضم ليه المغرب غير مؤخرا ..
🟢 الرسالة المغربية فهاد المرحلة واضحة: المغرب متمسك بالسلم، وبالحل السياسي، ولكن ما باغيش يخلي مستقبل الصحراء المغربية رهين باجتماعات وتقارير ومفاوضات كتعاود راسها كل عام. والوحدة الترابية بالنسبة للمغرب مبقاش موضوع قابل للمساومة.
المغرب دخل مرحلة جديدة فملف الصحراء، والمرحلة المقبلة غادي تبين واش نهاية مهمة المينورسو غتكون فعلاً بداية طي صفحة النزاع داخل الأمم المتحدة، والانتقال نحو تسوية سياسية نهائية.
#المغرب #الصحراء_المغربية #المينورسو #قرار_2797 #مجلس_الأمن #الحكم_الذاتي #الدبلوماسية_المغربية #lakta
ليست هناك تعليقات:
إرسال تعليق